政壇：雙學由天堂跌落地獄

學聯瀕死 學民無品

舊年佔領期間，學民思潮同學聯（雙學）兩大學生團體，人氣支持度高企，曾經喺港大民調十大政黨評分中高踞頭幾名。但好景不常，佔領結束後，市民即刻對雙學支持度驟降，最新港大民調十大政黨評分中，雙學因為市民認知率過低而不獲評分，名副其實跌到冇影。估唔到市民咁快就對雙學熱情減退，唔通雙學真面目已畀人睇穿咗？

先講吓雙學近況。學聯喺佔領期間呼風喚雨，但係近日已由天堂跌落地獄，唔止支持者流失，仲面臨瓦解，先後有港大、理大同浸大通過公投退出學聯，而城大退聯就仲投緊票，如果再失一員，睇怕學聯同一間空殼公司無乜分別。學民思潮亦唔好得去邊，舊年佢哋多次要求白鴿黨立法會議員「AV仁」何俊仁辭職引發變相公投，到AV仁答應會辭職，學民思潮又唔肯加入公投委員會，只係施捨式畀二十萬元就算，令唔少人覺得學民思潮無乜政治道德。

可能因為雙學頻頻爆出負面消息，連帶拖低咗市民認知率。港大民意研究計劃公布最新十大政治團體評分結果，發現舊年佔領期間排名榜首嘅學聯同排行第五嘅學民思潮，都因為認知率過低而不獲評分，變相跌出十大政團排名外。因為躋身十大政團嘅先決條件，市民認知率必須排在頭十二位內，而雙學認知率突然大跌，排喺第十三、十四位，所以連評分都無。

今次係佔領結束後港大民調首次做同類調查，結果發現所有政黨評分都回升，但評分依然不過五十。而雙學跌出十大，重新打入十大填補雙學空缺嘅就有民協同工黨，而民協仲喺十大政團中排名第三，工黨則排名第六。