港人食飽無憂米 浪費餸菜大嘥鬼

呢，本港八間大學宣稱全力響應「惜食香港運動」，盡量減少廚餘，喺飯堂設置回收站及廚餘收集機，仲話鼓勵同學提出少飯要求，反應十分理想添。可惜吖，事實根本唔係嗰回事，本報記者巡查港大、中大、城大同嶺大嘅食堂後發現，部分食堂冇張貼惜食海報唔在講，食剩飯餸問題亦非常嚴重，其中中大食堂最誇張，有多達三成人食剩嘢。

講出嚟嚇親大家，原來各大學產生嘅廚餘數量相當驚人，以中大為例，舊年回收嘅廚餘就高達一萬一千多公斤。至於學生食剩嘢嘅藉口，都係老生常談，量太大、太難食、唔舒服甚至減緊肥……總之就大條道理係喇。

唔係啩，廣告都有賣啦，「大嘥鬼」眼闊肚窄，人見人憎，唔通佢哋冇睇過？講真，珍惜食物只係舉手之勞，一句「少飯」就搞掂，又或者兩三個同學分享，再唔係就自助裝飯，食幾多自己決定，點解咁都唔肯行多步呢？有環保人士就講得啱嘞，依家啲大學生多數來自物質充裕嘅家庭，從未經歷過貧窮，根本體會唔到粒粒皆辛苦，又點識珍惜食物吖。

開講有話，有食唔食，罪大惡極。雖然老一輩話浪費食物直頭會畀雷劈係誇張咗啲，但家陣世界上好多人捱緊餓，係不爭嘅事實，香港年輕人食飽無憂米，係咪應該更加惜福呢。不過話分兩頭，香港遍地「大嘥鬼」，又點止大學生吖。過去十年本港廚餘數量急增近三倍，達到每日超過三千公噸，佔每日棄置垃圾量嘅三分之一，都咪話唔誇張。

不可不知，食剩飯餸唔單止造成浪費，仲好唔環保。家陣三個堆填區已經接近飽和，再加埋廚餘嘅負擔，盞更快滿瀉嘅咋。其實，廚餘有好多循環再用嘅價值，除咗可以做肥料同魚糧，仲可以用嚟發電。有人計過數，廚餘發電可以供應本地用量嘅百分之一至二。南韓十幾年前就推行廚餘發電，證明真係可行，反觀香港嘅垃圾回收十年如一日，仍然停留喺最原始嘅三色回收箱階段，認真羞家。

惜食等於惜福，點解人哋做得到，香港做唔到？除咗市民環保意識低，根本原因仲係政府無能。點都好喇，環保唔係得把口講，無論政府抑或市民都要身體力行，始終個地球大家都有份o架嘛，叮！