城中鏡:下拍拍:阿里「幽默」招聘 玩出歧視大頭佛
由馬雲揸fit嘅阿里巴巴,上星期出咗個招聘廣告,話請「程序員(即程式員)鼓勵師」,首要嘅條件係「顏值對程序員有足夠震撼力」,而且仲講明要有韓星宋慧喬同AV女優蒼井空質素,又話要如蒼老師般「胸懷天下,進可欺身壓海棠,退可提臂迎蛟龍」。吓!睇到一頭霧水。
呢個招聘廣告由創意變咗闖禍,睇怕馬雲都好頭痕呀!(資料圖片)
咁份工做啲乜?負責讚美啲程式員喎,唔止要叫人起身同安排早會,仲要出差到唔同國家送上鼓勵。吓!人肉速遞?到底當班鼓勵師係乜?
好多網友睇到眼火爆,圍插阿里性別歧視,仲有人寸阿里請「慰安婦」。連內地男程式員都話,搞個咁嘅工作崗位,唔單止侮辱女性,仲侮辱埋佢哋男性程式員添。咁嘅事件,外國媒體梗關注啦……唉。
結果,阿里拿拿聲「修正」番兼道歉,又解釋話原意係想透過「幽默方式」招聘人才。吓!仲解釋!