城中鏡：上影影：龍殿兒為尼泊爾籌款
香港高級私人會所Kee Club太子女Mara龍殿兒喺近兩年突然「消失」Ball場，原來活躍開朗嘅佢，因母親一場大病，難以承受而患上抑鬱症，之後離開香港，期間曾到歐洲同尼泊爾低調接受治療，現已康復。
龍殿兒早前喺尼泊爾夥拍一位導演喺當地拍攝紀錄片同照片。
Mara喺尼泊爾養病期間，曾夥拍一位導演喺當地拍攝紀錄片同照片，但可惜病況未好轉，該輯照片一直未有曝光。而早前尼泊爾大地震，佢即希望可以為當地出一分力，隨即聯絡導演，商討舉行慈善畫展同拍賣籌款，而慈善酒會將喺本周四舉行，希望籌得更多善款，幫助當地居民。
對於曾患抑鬱病，Mara毫不避忌，大方談及話：「當時因為媽咪病咗，我原本喺歐洲，即刻返香港照顧，見到佢好辛苦，當時自己壓力好大。加上面對自己將來，又諗唔到自己應該做咩工作，無咗方向，覺得好迷失，心情變得好差，之後就患上呢個病，個病都擾攘咗兩年，後來繼續治療同埋自己正面去面對，諗通咗，加上搵到自己對時裝嘅興趣，有動力去實行，我仲會自己成立時裝品牌。」
至於為尼泊爾籌款一事，Mara話：「我喺當地生活過一段時間，好開心，情緒亦變得好好，離開咗後，情緒又跌落深淵，之後去咗歐洲，心情又平復不少，今次見到地震咁嚴重，真係希望可以為佢哋出一分力。」
