SUN搞作：網絡小說：日日感恩

「祝大家感恩節快樂！」小香急不及待打開蓋子，詎料……「咦，臭嘅，媽咪你喺邊度買？」慈母臉色一沉，「小香，你唔可以咁講嘢！」

「但……真係好臭……」小香口顫。慈母不耐煩，「人哋蝕本賣畀我哋，你仲想點？」臭氣熏天，小香難忍惡臭，以手掩鼻，「咁咪即係我哋畀錢買臭嘢，究竟係人哋奸定我哋笨？」

雖然句句錐心，但童言無忌，慈母只勸道︰「好喇，唔好再講，快啲飲水慶祝，記住飲水思源之恩。」不過，小香好奇心重，續問下去，「賣臭水都有錢賺，唔通係要我哋飲水思『元』？仲有我聽人哋講感恩節係一年一度，食火雞慶祝，點解我哋三百六十五日都係，仲要係飲水？」

慈母怒氣爆發，頓現猙獰，「飲得人哋嘅水，我哋就要感恩，咁日日都要飲水，咪要日日感恩囉！」