政壇：搞搞政：解構民調走勢字眼左右升跌

問責官員近期紛紛落區推銷政改，最近多個民調都顯示，支持政改方案的受訪者約有五成，反對的有三成多，有泛民中人私下解讀民調結果，顯示有堅實反對政改「袋住先」民意，變相增加佢哋嘅政治籌碼。

「袋住先」隨時過六成

但有政府中人解構目前民調走勢之謎，指多個民調均只係問及市民係咪支持政改方案，相反另有機構民調問及，市民係咪支持政改方案通過時，支持比率隨即增至近六成，加上隨着愈來愈接近政改方案年中表決嘅時間，支持政改方案通過嘅市民會繼續增加，料民意將更貼近或超過六成支持。而事有巧合，由建制派中人成立嘅「香港公民行動」尋日公布政改民調，問及受訪者立法會應否通過政改，結果有五成五受訪者表示應該通過，似乎同政府中人解構民調之謎脗合。

富貴黨榮譽主席田北俊同日亦加入民意爭奪戰行列，決定自掏腰包二十五萬元，委託港大民研於政改方案表決前十多日進行政改民調，屆時只會問及一條問題，就係受訪者是否支持政改方案，而值得留意嘅係，平時民調樣本數目通常係一千左右，今次佢要求民調樣本數目提升至五千，據報結果誤差可以減少一半。

田北俊話希望民調結果可游說泛民支持政改，但如果反對政改嘅比例較高，佢都會支持政改通過，事關佢相信結果會反映民意係傾向支持政改，再次希望泛民尊重民意。究竟到時民意走勢會否一如政府中人所料，而田北俊嘅如意算盤係咪敲得響，下月中自有分曉。