政壇：股神傳授智慧7小時
啱啱個周末，股神巴菲特同拍檔芒格喺巴郡股東會上，同股東傾足七粒鐘，由投資講到捐身家，到食乜先會長命，乜都講一餐。以下多句包含股神智慧，醒啲畀大家學嘢。
股神巴菲特同拍檔芒格喺巴郡股東會上，向股東傳授智慧七粒鐘。（資料圖片）
講投資︰如果唔係咁多蠢人蠢事，我哋點會咁發呀？
講維權投資者︰我諗唔到有任何一個激進分子我會想同佢「對親家」。要頂得住激進嘅維權行動，最好咪就係畀啲堅嘅表現佢睇囉。
講美元︰我覺得美金可以做多五十年全球儲備貨幣。
講歐元區︰佢哋搞咗啲戇居嘢出嚟，你點都唔會傻到搵你最窮嗰個酒鬼老襟夾份搞生意吓話？
講銀價︰我哋已經唔諗銀囉喎。
講回購股份︰比起其他公司議題，硬係有人喺回購股份問題上，寫更多同做更加死蠢嘅嘢。只有當股價低過實際價值時，先應該回購。
講稅制︰聽到啲美國商界呻交稅，我一滴眼淚都唔會為佢哋流。
講互聯網︰正！個網改變我一生，但都只不過使我一百蚊美金一年！
講捐身家︰下邊（死後）冇福布斯400富豪榜。
講反話也好，開玩笑甚至玩刻薄都好，佢兩位股神每每衝擊專家睇法，不顧世俗眼光，一句到尾，就係堅守自己信念原則。收到冇？
