政壇：長毛捐立會人工搞抗爭
話說社民連立法會議員「長毛」梁國雄每月領取逾九萬元嘅人工，但仍居於公屋，結果惹來質疑，日前網上更流傳一段短片，片中嘅長毛返緊住所時，有人鬧爆長毛「霸公屋」、「拎黑金」，長毛就以「收皮啦，師奶」回敬。短片於網上曝光後，一名自稱係社民連成員嘅人幫長毛解畫，話長毛資產冇過審查標準，所以住公屋係合理合法。但佢同時踢爆長毛喺每月將大部分人工捐咗去抗爭基金，用嚟支付抗爭相關嘅開支，真係愈解愈幫倒忙嘞！
長毛早前返回住所時，被人用手機拍攝，期間兩人發生口角，短片中有人鬧長毛「死賤人、狗賊、漢奸」，又批評佢「拎黑金」仲霸佔公屋，長毛反駁稱房署會查，更叫對方直接去房署告佢。不過，拍攝者繼續尾隨其後，更諷刺長毛「夠鐘入監剪髮，坐監有錢收」，長毛則邊行邊反駁，直至返到住所大廈，歷時近兩分鐘嘅對話先完結。
辯稱資產未過公屋標準
尋日一名自稱係社民連成員嘅人主動回應長毛住公屋嘅問題。佢於社交網站話，房署會定期審查住客嘅財務情況，包括人工同資產。雖然長毛人工係過咗標準，但佢將大部分人工捐咗出去，所以資產並冇過標準，只需交番市值租金，住公屋亦合理合法，而非房署放生。
一直以嚟，外界都流傳長毛將大部分人工捐出另有用途，點知呢名自稱社民連成員踢爆，長毛係將人工捐咗去一個抗爭基金，而基金冇乜特定用途，最常用都係支付社運人士被捕或被告嘅保釋金、律師費同罰款。另一方面，部分新成立嘅社運團體，或者想選區議員但又冇資金嘅人都會問基金拎錢，形容資助範圍真係相當廣泛。至於仲有邊個捐錢畀抗爭基金、基金日常運作等詳情，佢就冇詳細透露。
事實上，長毛早前被揭收取壹傳媒集團前主席黎智英捐款已經搞到一身蟻，立法會議員個人利益監察委員會亦正調查有關事件，依家佢又涉嫌用立法會人工資助抗爭活動，真係一波未平，一波又起，睇怕有排至可以解釋清楚。
