灣仔：小巷僭建舖 屋署扮盲
「上年又話會出清拆令，今年都仲係郁都冇郁過，咁同縱容有咩分別？」灣仔居民李先生指出，去年閱報時得悉駱克道有大廈之間的小巷被闢作店舖，惟發現拖延至今仍未見取締，質疑屋宇署執法不力，「依家喺正鬧市都冇人理，咁其他人咪見縫插針，有位就僭建？」
屋宇署指涉事僭建店舖早已記錄在案，惟拖延經年仍未見清拆。
屋宇署發言人證實，涉事僭建物早已記錄在案，將按現行執法政策，按序透過大規模行動向有關業主發出清拆令，事前亦已致函敦促盡早安排自行清拆。
李先生不滿屋宇署處事緩慢，導致拖延逾年仍是清拆無期，認為需作出檢討，以改善執法效率，「佢講啲嘢同上年幾乎一模一樣，係得嘅話就晨早搞掂咗啦，屋宇署真係要諗清楚，除咗拖字訣仲要咩方法應付問題。」
