車房民居零距離 城門失火殃池魚

嗱，呢場慘劇點止造成三死九傷，仲炸出全港車房嘅安全隱患添。唔講唔知，相對全港二萬幾架石油氣車輛，攞正牌修理嘅車房淨係得二十幾間咁大把，平均一間有牌車房服務近千架車，唔食唔瞓都做唔切，有無牌車房博大霧，卒之搞出人命。司機貪平也好，貪方便也好，只要無牌車房存在，想唔出事都幾難，今次爆炸嘅正正係無牌車房，有人話出事唔係偶然，而係必然，一啲都冇講錯。對於呢種亂象，上述調查顯示近四成受訪市民認為相關法例存在漏洞；三成三指配套嚴重不足。

更牙煙嘅係，部分車房忽視安全管理，壓縮氣樽亂咁放，油罐同其他雜物堆滿車房，有員工甚至將風煤樽擺出店外，仲要喺旁邊吞雲吐霧，爆大鑊只係遲早嘅咋。加上好多車房都位於人口稠密嘅舊區，喺正民居隔籬，一旦城門失火，隨時殃及池魚。有當區區議員踢爆，慈雲山街坊曾多次向有關部門反映車房安全問題，要求當局逐步規管車房，同時要加強巡查，點知官老爺左耳入，右耳出，不了了之，最終爆大鑊。

講開又講，呢次慘劇亦涉及執法不力。數據顯示，機電署過去兩年僅僅抽查普通車房約五百次，因違規修理石油氣車輛被檢控嘅個案僅得一宗咁大把，點止冇阻嚇力，直情變相鼓勵喇。嗱，四成三受訪市民認為當局只係象徵式抽查，力度不足；兩成七認為咁做無法有效規管。

冇錯，港府多年前係就係成立工作小組討論規管車房安全，仲承諾○八年檢討自願註冊計劃添，家陣七年過咗，無晒聲氣。唔怪得四成七受訪者認為應該盡快強制立法規管，提高安全；兩成五人指當局危機意識不足，漠視問題；逾兩成不滿當局玩拖字訣喇。

亡羊補牢，未為晚也。有立法會議員促請當局盡快查明爆炸真相，並制訂時間表，實施車房註冊制度。計太一叮話齋，除咗發牌規管，仲要解決車房離民居太近嘅問題，如果唔消除呢個計時炸彈，等再爆大鑊至諗計，咁就乜都太遲咯，叮！