城中鏡：媽咪話恨抱孫 唐貝詩嚇一跳
名媛寇鴻萍嘅大女唐貝詩尋日出席一個活動時，提到母親節，佢話會約媽咪同婆婆食飯，亦會準備禮物送畀佢哋。佢又笑言早前媽咪揚言想做「婆婆」，嚇咗佢一跳添！問到母親節聚會會唔會帶同男友出席？佢話：「我冇拍拖。我啱啱簽咗新公司，呢幾年係我嘅新階段，唔會咁快plan另一樣嘢。拍拖可以，不過唔會結婚住。」
唐貝詩話想公餘多做有意義的事。
公餘時間多做善事
問到佢會唔會push妹妹唐貝欣結婚？唐貝詩話唔理呢啲嘢，妹妹有自己嘅選擇，不過愛情呢啲嘢，鍾意嘅時候都控制唔到。
佢又透露自己擔任咗慈善晚宴籌委會成員，剛簽約成為娛樂公司藝人嘅佢，話目前尚未有太多工作，希望喺公餘時間多做有意義嘅事。問佢有冇向媽咪取經？佢話：「依家仲喺策劃階段，我嘅工作主要係籌款及做宣傳，同設計活動內容。好多人都覺得去ball好奢華，我希望令個ball有意義啲，會喺晚宴上播啲反映到社會實況嘅片段。」
