政壇：星之子做新智庫顧問
喺持續七十九日嘅佔領行動結束後，唔少人都覺得香港要多啲正能量，部分政商界名人帶頭成立民間智庫組織，其中一個名為「政賢力量」嘅新智庫尋日舉行成立典禮，有「星之子」之稱嘅陳易希係顧問團成員之一，期間佢仲現身說法，大談自己年紀輕輕就做手機軟件公司CEO嘅成功之道。
「星之子」陳易希出任新智庫顧問團成員。（資料圖片）
「政賢力量」舉行成立典禮前，已經先後公布兩個同青年創業同青年置業有關嘅民調，主席蘇祉祺喺成立典禮致詞時話，政府管治依家面對巨大挑戰，原因係政府對公共政策研究不足，把握唔到民情，兼面對政治人才不足嘅問題，希望智庫可以為香港培養人才。
顧問團成員仲有考評局主席陳仲尼、發展局前政治助理何建宗、香港青年聯會主席霍啟剛同學者沈旭輝等人。
