政壇：李秀恒細時住劏房熟粗口
住屋問題困擾唔少市民，中華廠商聯合會會長Eddy李秀恒自爆，細個時同屋企人住板間房，要幾家人共用一個廚房同廁所，一到夜晚大家就粗口滿天飛，又自言當時冇嘢叻，但對粗口好熟悉咁話。
李秀恒自爆小時候住板間房，對粗口好熟悉。（互聯網圖片）
Eddy尋日接受立法會議員Ann蔣麗芸嘅網上節目訪問，阿Ann喺節目中介紹Eddy時指對方係住屋邨大，Eddy即刻回應話：「我都好希望住屋邨。」形容細個時同屋企人住嘅，係四、五百呎嘅屋間咗四、五間板間房，佢哋一家住中間嘅板間房連窗都冇，好彩啲木板唔到天花板，先有啲空氣透入嚟，佢仲向阿Ann笑言，「邊有你咁幸福」。
跟住Eddy講到踏入社會後，自己畀日本鐘錶公司挖角，佢話雖然後來已經係全公司嘅中國人當中，人工最高，但佢發現啲老細換嚟換去都係日本人，覺得發展機會有限，所以決定創業，勉勵年輕人想創業，要先積累多啲經驗同要不斷創新。
