最近發生富二代被綁架案，震動全城。尋日喺一個活動中見到榮升娛樂公司老闆嘅諸葛紫岐，問到會唔會分外小心留意囝囝Arthur嘅人身安全時，佢話：「其實都幾shocking，不過我都好小心，有姐姐跟住，又有司機哥哥，或者父母跟。」

諸葛紫岐出席活動時，講起富二代被綁架案話幾shocking。

再問佢會唔會請保鏢呀？諸葛紫岐話：「司機哥哥本身係保鏢，好大隻，姐姐都好大隻，希望小心啲。囝囝好friendly，見人就Hi，啲人叫佢come，佢就會望。不過，大家都會睇住佢，佢依家先十七個月大，都係返學同小朋友玩。不過都OK嘅，好多對眼望住佢，唔擔心嘅。」

佢又透露最近忙於工作，尋日先返港，過兩天又要飛北京。提到母親節，佢笑言對佢嚟講係喺芸芸嘅節日中最低地位嘅一個節日，只會同家人食飯慶祝。問到囝囝會唔會送禮物畀佢？佢話：「佢依家淨係識錫錫，佢好鍾意kiss我。」至於老公送乜畀佢？佢引述老公話「我都唔係你個仔」，但老公會送嘢畀佢媽咪。做媽咪要顧好多嘢，所以佢亦準備咗禮物送畀奶奶同媽咪。

第一手消息請下載on.cc東網iPhone/iPad/Android/Windows Phone Apps