政壇：何君堯舌戰鄧小樺 挑機嗌除衫 撐創作自由
話說嶺南大學學生會早前舉行學生音樂會，有表演團體大唱辱警粗口歌而惹起爭議，雖然嶺南大學校董會前主席陳智思同校長鄭國漢先後就事件致歉，鄭國漢仲喺電郵中警誡學生會勿再犯，否則會紀律處分，但風波唔單止未能平息，尋日火頭仲蔓延到一個論壇。曾要求立即解散嶺大學生會嘅律師何君堯，尋日同文化評論人鄧小樺、嶺大學生會會長劉振琳火併，仲多次挑機指佢哋夠膽就喺個節目度讀出粗口歌詞，其後更疑測試社會期望底線，點名指鄧小樺點解唔喺台上脫去衣服以表現行為藝術。
（設計圖片及對白）
尋日一個論壇討論嶺大粗口音樂會風波時，場內場外激烈爭辯，先有保衞香港運動發起人傅振中到場「挑機」，要求嶺大學生會向警察道歉，而場外亦有市民拎住大聲公指罵劉振琳係「垃圾、讀屎片」。
何君堯喺節目初段引用《公安條例》，解釋粗口歌詞帶有恐嚇同侮辱成分，鄧小樺反駁指屬創作自由，仲話粗口歌事件只係表達意見嘅過程。搞到何君堯愈講愈激動，仲幾次叫鄧小樺同劉振琳夠膽就喺個節目度讀出粗口歌詞，劉振琳其後發言時提醒何君堯，呼籲對方冷靜啲，話「我哋上緊電視」。
批學生「博雅定博拉」
何君堯喺節目後解釋，佢叫人喺節目上讀出粗口歌詞，目的係想測試對方有冇膽量喺直播節目，做出佢哋聲稱係啱嘅事。佢又批評嶺大學生會執迷不悔，是非不分：「大學係要有博雅教育，定係博拉嘅行為？」事件迄今都仲係咁風風火火，究竟呢場風波幾時先可以平息？真係要睇事態發展嘞！
另外，論壇又出現一段小插曲，話說撐警大聯盟召集人李偲嫣喺論壇開始前，走去同節目主持人理論，不滿對方冇邀請佢出任嘉賓，但遭暗批同何君堯相比「差九截」。
