小學教育填鴨式 揠苗助長反效果

呢，本報記者最近統計發現，唔少小學規定學生每學年要睇二十至六十本課外書，部分更要求學生睇完後交閱讀報告，否則當欠交功課。

唔係啩，一年睇六十本書，即係平均每個月睇五本，大人都未必做得到啦，何況係小學生？正如有家長話齋，小朋友做功課同溫書搞到三更半夜，根本無時間睇課外書，惟有去圖書館抄低書名算數。有啲學生比較認真，亦只會睇最後幾頁，然後湊齊百零字所謂嘅閱讀報告交差。課外閱讀本來應該係一種興趣，家陣居然變成一種任務，一種壓力，搞到要弄虛作假篤數交差，你話係咪搵嚟搞吖？

有教育界人士就講得啱嘞，連睇幾多書都要強迫，搞到好似跑數咁，只會令學生產生懼怕心理，再咁落去，閱讀風氣遲早畀呢種填鴨式政策打沉。唔係杞人憂天。有調查發現，一成中學生從來唔買書，兩成半人從未去過書展，去過公共圖書館借書嘅更加不足三成。其實唔使睇調查數據，只要睇吓家陣幾乎個個年輕人都係低頭族，一味掛住玩手機，就知道閱讀風氣有幾淡喇。難為教育局仲死撐一向對推廣閱讀風氣好重視，簡直係自欺欺人。

又難怪依家學生視讀書為畏途嘅。提起書本，小朋友第一時間只會諗到應付考試嘅「雞精書」，本來已經抗拒，加上連睇課外書都有任務，梗係耍手擰頭喇。

係人都知，香港升學競爭激烈，大學、中學、小學固然爭崩頭，連報讀幼稚園都要排長龍，唔少準媽媽十月懷胎就要四圍去撲位，簡直誇張。再睇吓升學面試，各種補習速成班開到成行成市，甚至有補習社標榜將小朋友訓練成幼兒班「面試之王」。試過有五歲小童因為不堪升小一面試壓力搞到想尋死，最終要向精神科醫生求助，都咪話唔得人驚。

有句成語叫「揠苗助長」，有人嫌禾苗生長太慢，用手拔高，結果適得其反。學習都係一樣，一味催谷隨時害咗學生，外國經驗早已證明，唔着重功課、考試同排名，一樣可以教出精英。他山之石，可以攻玉，香港教育係咪應該吸收人哋嘅經驗呢，叮！