SUN搞作：網絡小說：紫霞珠
「踏破鐵鞋無覓處，得來全不費工夫，狗賊貪曾，受死啦！」女俠金保玲雌獅怒吼，嚇得貪曾跪地求饒：「女俠，你我素無過節，再者本貪曾已龜縮多時，街都唔敢去，慘過坑渠老鼠，請女俠饒我狗命！」
貪曾連連叩頭，但見金保玲從紙片般嘅身軀掏出一段紫霞珠串，光芒登時照亮黑夜，貪曾見此舊物，即時屁滾尿流：「原來……原來你係九索飛鈴門嘅死剩種？」
金保玲收好珠串，厲聲道：「貪曾，你當日為官，為咗死後虛名，竟然硬推乜嘢十大基建，強徵本門老少做苦力，仲借機搜刮民脂搵着數，本門上下力抗暴政，畀你派來嘅匪兵通通殺光，最後連鎮派之寶紫霞珠都畀你擸埋，掌門父親拚死搶回一段，交我手中保我逃命。我為咗報仇日夜苦練，就係等今日手刃你呢隻奸狗！」咔嚓一聲，貪曾身首異處，為報仇而活嘅金保玲，今日終於擺脫仇恨枷鎖，封刀隱居。
