話說工聯會理事長「吳揪得」吳秋北早前代表工會討論落實標準工時「撻Q」，更被榮譽會長陳婉嫻訓話，指佢唔夠精明，吳揪得事後自言「叫我扮精明我做唔到」。唔知係咪衰開有條路，吳揪得被問到會唔會支持統一公眾及法定假期嘅草案時，同副會長KK黃國健各說各話，真係唔知信邊個好。

（設計圖片）

工黨李卓人向立法會提交私人條例草案，建議法定假期由現時十二日加到十七日，同公眾假期睇齊；工聯會自從舊年底因冇投票支持落實七日男士侍產假而搞到滿城風雨後，佢哋就勞工議題嘅投票取向自然成為焦點。不過，身兼勞工顧問委員會僱員代表嘅吳揪得就話，所有勞工政策都係經勞顧會醞釀，統一公眾假期日數應先喺勞顧會達成共識，先再擺喺立法會討論，所以工聯會會唔會支持法案要視乎情況喎。

不過，身兼立法會議員嘅KK態度就正面得多，話原則上支持一步到位統一假期日數，只要李卓人唔好喺草案「塞咁多政治嘢」，工聯會六票都會投支持，唔會提修訂阻撓。究竟工聯會支唔支持法案，除咗對佢哋嘅誠信一大考驗外，佢哋就勞工立場口徑不一，睇怕會係更加大嘅考驗。

齊幫王國興解圍

雖然工聯會內部對勞工議題未夾定口供，但已為議員「阿王」王國興嘅「收皮論」解圍，立場仲好一致添。KK解釋「收皮」的確唔係斯文人、上流社會講嘅語言，但阿王係「基層工會嘅代表」，所以講基層嘅語言冇咩問題喎。如果係咁，點解唔講埋粗口呢？吳揪得更加愈講愈興起，佢批評學生講晒粗口都冇人要佢哋道歉，阿王只係講句俚語就要道歉，係乜嘢世界？認真大冤情喎！

第一手消息請下載on.cc東網iPhone/iPad/Android/Windows Phone Apps