政壇：黃進達惜目甘做四眼仔
戴眼鏡嘅人一向被戲稱為「四眼田雞」，難怪隱形眼鏡愈來愈盛行，但戴隱形眼鏡容易眼乾，真係有苦自己知，唔少城中名人寧願做番四眼仔。好似康泰旅行社董事總經理Jason黃進達同社區參與助更生委員會主席蕭楚基，一個淨係做運動時先戴隱形眼鏡，一個就索性放棄戴咗三十五年嘅習慣。一句講晒，健康至上。
黃進達難得戴隱形眼鏡現身。（互聯網圖片）
黃進達讀小學時已有散光。（互聯網圖片）
做運動戴隱形鏡
Jason平日愛「四眼」老成打扮，因佢從小學開始已有散光，所以好識錫住雙眼，為咗避免雙眼乾澀同疲勞，所以平日盡量少戴隱形眼鏡，只有做運動時先會戴。早前喺馬場見到佢，佢副眼鏡突然唔見咗，原來當日佢啱啱跑完馬拉松。
蕭楚基最近亦轉咗形象，經常戴住有框眼鏡。佢話戴咗隱形眼鏡三十五年，隨住年紀大，淚液分泌不足，有時瞌一瞌眼瞓，對眼就會好痛，甚至乾到睜唔大。醫生勸佢唔好再戴，於是佢就配咗副超輕身眼鏡，相信要適應一段時間。
行政會議成員張志剛經常戴住副圓碌碌眼鏡，就成為佢嘅個人標誌。佢話已戴咗圓框眼鏡十幾年，因為近年體重上升至一百六十磅，塊面變成方形，所以轉戴圓框眼鏡好睇啲。唔講唔知，佢讀書時身形都幾瘦削，屬「V面」一族，所以當年係戴方框眼鏡。不過佢自爆就嚟唔使再戴眼鏡，皆因怕麻煩，正考慮做激光矯視喎！
