政壇：高永文出口術撐政改
為咗宣傳政改方案，政府高層由「離地」到「落地」，咁都不特止，仲要識插針，做到無孔不入。話說食物及衞生局局長高永文尋日出席國際護士節活動時，明明講緊跑步做運動，竟然都畀佢入到位話要努力跑到二○一七，仲話覺得自己有責任游說立法會醫學界議員「怪醫」梁家騮同衞生服務界嘅李國麟，投票支持政改方案。高永文出口術將撬票責任攬上身，唔知其他政策局局長有冇覺得有壓力，去游說自己監管範疇內功能組別立法會議員投贊成票呢？
（設計圖片及對白）
護士節做主禮嘉賓
護協尋日搞咗個「護愛運動同樂日」，邀請高永文做主禮嘉賓，咁啱身兼香港護士協會主席嘅李國麟都在場，佢哋仲同台分享運動樂趣。李國麟話喺立法會做得最多嘅就係「行來行去」，仲話（拉布時）一點人數就行番入去，如果帶個計步器分分鐘日行萬步喎！咪睇高永文平時好斯文，佢聽完即刻反寸李國麟：「你唔好為拉布辯護喎！」高永文仲打蛇隨棍上，問佢係咪「拉布」拉到悶，就出去行吓？
呼籲議員唔好拉布
台上火花四濺，台下一樣好精彩。儀式完咗後，高永文接受傳媒訪問時繼續採取攻勢，話近排落區宣傳政改，留意到大部分市民都希望通過方案，只有兩、三成唔支持。佢覺得自己有責任游說梁家騮同李國麟，成全大部分市民期望，仲講明會約佢哋兩位見面喎！好明顯佢係瞄準「獵物」，但射唔射得中就好難講喎。
高永文之後就細數拉布嘅禍害，話前一輪拉布已令佛教醫院工程要重新招標，造價升咗一、兩成。其後仲有聯合醫院、骨灰龕等等好多項工程排緊隊，希望議員唔好再拉布。佢又話已經同立法會協調中，睇吓可唔可以審議呢啲議程先。
