城中鏡：上影影：趙式慶打造3D武術寶典
中華國術總會創辦人趙式慶一直希望將武術文化同意念普及化，早前認識咗城市大學電子工程學系助理教授張澤松，後一拍即合，同城大合作以三維（3D）動態數據擷取技術製作首個《香港武術活態資料庫》。資料庫將記錄蔡李佛拳、洪拳、詠春拳、周家螳螂拳、福建永春白鶴拳同太極拳等多個唔同門派嘅絕學招式，期望資料庫陸續擴大，湊成「武林寶典」。至於下一步會研究推出手機應用程式，讓市民隨時隨地輕易正確練武功。
武術招式化作電子影像輸入系統。
趙式慶（左）同張澤松合作創立首個3D《香港武術活態資料庫》。
盼自鑄刀劍
工欲善其事，必先利其器，唔少學武之人都有自己專用嘅武具，甚至親手製作。原來趙式慶都學過製造刀劍，話說佢同鑄劍師胡小軍係好朋友，早前去拜訪對方時都有學過鑄造刀劍，但佢身為初哥只係試玩，整得唔好，打磨得未夠靚，所以都冇留低啲試驗品做紀念，希望嚟緊有機會又有時間嘅話，可以打造番把真正屬於自己嘅刀喎。
