唔係香港冇着數 誰願貼錢買難受
太一叮想同大家分享一個好消息，一個壞消息。好消息係，一連五周嘅「開心著數大行動」尋日開波，業界反應踴躍，逾萬商舖參與，優惠多籮籮；咁壞消息呢？之唔係業界反應踴躍，優惠多籮籮囉。
可能大家會問︰又一蚊鮑魚，又半價珠寶，又六折主題公園套票，直頭係消費者嘅福音，擔櫈仔排頭位都嚟唔切，點會係壞消息呀？即係咁，港府同業界之所以聯手發起呢個行動，係為咗打救瀕危嘅旅遊業，所以話，業界反應愈積極，旅業危機愈深重，你話唔閉翳就假咯。
只要睇吓數字，就知點解咁愁嘞。上個月訪港旅客按年下跌百分之八點七，復活節假期及清明長假期內地旅客銳減一成四，至於即將來臨嘅「五一黃金周」，情況亦唔樂觀，酒店訂房率較同期跌超過三成，旅行團預計亦會下跌兩成，問你點頂！
「冷冷清清，悽悽慘慘戚戚」，呢首詞形容今日香港旅業，最貼切不過。搞成今日咁嘅田地，諗落都幾諷刺。當年沙士後經濟奄奄一息，港府就話要北上向阿爺班救兵，推出個人遊政策「北水南調」啫，之但係今時唔同往日，家陣既無嚴重疫情，又無經濟危機，股市樓市更加係熱火朝天，旅業居然淪落到要「大割引」救亡，簡直匪夷所思。
咁點解旅客過門不入呢？好簡單啫，唔係香港冇着數，皆因玩得唔開心。家陣成個社會烏煙瘴氣，家嘈屋閉，動感之都就冇嘞，動亂之都就有之。尋日之嘛，鳩嗚兵團死灰復燃，旺角黑夜淪為街頭戰場，自製路障、暴力衝擊警察樣樣齊，有人甚至夠膽死拉隊喺警局門外晒馬，旅客睇到呢一幕，仲敢嚟咩！
更離譜嘅係，少數激進分子掛住反水貨客羊頭，賣歧視內地旅客狗肉，郁吓就「光復」，郁吓就踢篋鬧人，港府唔依法辦事，嚴懲暴力行為不特止，反而陪佢哋癲，將「一簽多行」改為「一周一行」，美其名優化旅客結構，實質係嫌貧愛富，挑肥揀瘦，擺明玩歧視，依家轉個頭又話推廣旅遊，吸引旅客，你話係咪自相矛盾，莫名其妙吖。
出得嚟行，預咗要還；出得嚟玩，唔會諗慳。好玩好客嘅地方多的是，冇人會為咗小小着數貼錢買難受嘅。所以話，只要暴戾同歧視嘅文化唔改，莫講話「大割引」，割埋肉都一樣唔掂嘅咋，叮！
