城中鏡：管清友變股海先知？

A股牛到咁，唔少內地股民都中咗「冧把降」，周圍問人攞「冧把」，專家嘅心水「冧把」更加係引死人。可能畀人問得多，民生証券研究院執行院長管清友，早排就喺微博叫大家唔好再問佢股市喇，仲話「除了股市，我們還有詩和遠方」。

管清友喺微博叫大家咪再問佢股市，點知其說話引起股民遐想。

明明係好浪漫叫人去旅行、讀下詩去探索生活，但眼中只有「冧把」嘅網民又點會就此罷手，網民即刻問「詩和遠方」係邊個板塊？乜冧把？有人玩嘢問係咪睇好「文化」同「旅遊產業」？有人仲話參透咗「詩和遠方」嘅聲母拼音（SHYF）同隻A股石化油服一模一樣，玩嘢話要即刻入市。

點知，出事喇。石化油服自上星期開始係咁升，尋日仲升停板。網民諗多咗變「開口中」，於是，更多人爭住向管院長跪求下輪部署策略。

呢句「詩和遠方」令管院長人氣急升，但佢有位研究員就不以為然，問阿管院長，身為研究員唔係應該寫好報告嘅咩？結果管院長輕輕拋低一句「好好寫，統計一下牛市裏還有幾個人看研報」。哦，明晒。