城中鏡：雷軍英文差王思聰寸爆
上星期小米部4i全球首發，印度市場咁大，首次境外發布會揀喺印度，冇乜出奇，但小米雷軍衝出世界，首次喺發布會上show英文就絕對非一般，仲非一般到畀內地超級富豪──萬達王健林位公子王思聰係微博「建議」乾脆咪出國。嗱，王公子之後有致歉o架，係好有自信咁致歉添！
睇完王思聰道歉嘅說話，唔知雷軍有乜嘢感想呢？（資料圖片）
王思聰
當日對住台下熱情嘅印度米粉，雷總先嚟打個招呼「Hello. How are you?」跟住嘅歷史性幾分鐘主要係「Do you like Mi 4i？Do you like Mi Band？......Are you OK？」睇住片，唔知幾想應雷總一句「Are you？」雷總最後仲講咗好幾次「OKOK」同「腥橋」，無錯，係「腥橋」，嚟答謝支持，用字淺白，夠晒親切。
轉頭喺微博致歉
唔少網民話聽完雷軍講英文，自信即刻返晒嚟。王公子王思聰直頭「建議」啲企業家英文唔好就咪出國丟架。
但冇耐，王公子尋日就喺番微博上就雷軍呢件事「致歉」，話「畢竟上一代的企業家沒有我們這代人的條件」。論條件，真係點比得上王公子？公子佢自細出國，喺英國貴族學校寄宿，仲係倫敦大學畢業添！王公子仲話，叫雷總下次需要翻譯，可私下搵佢。王公子咁有誠意，唔知雷軍會否應番佢一句「Are you OK？」呢。
