城中鏡：博愛新莊美女雲集
早前博愛醫院董事局舉行就職典禮，今屆董事局人數爆晒燈，多達四十人上限，名副其實係人才濟濟。接莊做主席嘅Winnie譚姜美珠見到場面咁墟冚，開心到笑晒。Winnie話好多想加入嘅人無奈被拒於門外，希望今屆董事局再做好啲，省靚博愛招牌，以吸引有心人士共振善業。
譚姜美珠（左）接替卸任主席何榮添做博愛主席。
李柏成升呢做副主席，亦擔負籌款重任。
陳李妮（中）拍住藍王雲仙（左）同蕭何元鳳兩位新總理做善事。
籌劃建最大型安老院
今屆新丁總理多達十幾人，其中有唔少靚女，包括善德基金會副主席蕭何元鳳同女兒蕭潔嵐，仲有博愛前主席藍國慶太太Mina藍王雲仙。Mina笑笑口話同Winnie相識多年，所以今屆加入博愛力撐，仲做埋籌募委員會成員，希望拍住副主席兼籌募委員會主席Jim李柏成，齊齊發力「吸水」。曾獲頒「積極參與獎」嘅Jim話，今年將全面鼓勵董事局成員幫手籌款，佢亦會喺唔同範疇出多啲力。
轉頭見到第一副主席陳李妮神采飛揚，佢話啱啱去完美國打理地產生意返港，過兩日又要飛去北京，認真頻撲，難得佢愈忙愈精神。
講起未來大計，Winnie話今屆重中之重係跟進興建全港最大型長者安老院一事，依家院方已初步訂立興建安老院舍方案。此外，博愛旗下美孚長者中心正申請擴建為長者日間護理中心，為未能入住安老院嘅長者及其家人提供協助，佢希望任內可以成功推動計劃，咁就功德圓滿喇！
