政壇：搞搞政：工總撐四選立會 梁君彥坐定粒六
明年就係立法會換屆選舉，唔少功能界別亦開始出現爭位戰。好似已做第三屆工業界（一）代表嘅梁君彥，早前就有傳工業總會（工總）內部有人不滿佢霸住個位太耐，要求換人。不過，工總主席劉展灝就好撐佢，話工總無明文規定議員只可做三屆，佢現時表現非常稱職，睇唔到有需要換人喎。劉展灝咁講，睇怕梁君彥來屆都坐定粒六，可安心過足其十六年議員生涯囉！
（設計圖片）
劉展灝尋日話雖然梁君彥做咗議員一段時間，但唔需要換人住，佢認為梁君彥身為內務委員會主席，表現受各方讚賞，如果佢有意爭取連任，相信工總會員都會撐佢。
行政總裁過檔港鐵
既然主席都開口力撐，梁君彥應該可以安全過下一關喇！我哋問佢係咪有意連任，佢就話千祈唔好咁講，自己暫時無諗選舉，只想疊埋心水做好目前工作喎。其實如果佢成功連任，將會係立法會主席熱門人選，之不過依家立法會郁親就「拉布」，到時「剪布」重任落喺佢身上，絕對唔易應付，隨時被泛民建制夾擊，認真吃力不討好。
雖然工總立法會代表多年不變，但係行政總裁職位就一波三折，曾任高官嘅現任行政總裁Linda蘇家碧九月會過檔港鐵做公司事務總監。Linda話今次真係「無縫交接」，因為佢離開工總翌日就會去港鐵返工，一日假都無得放，因為佢仲有好多工作要跟進，港鐵又想佢盡快返工，惟有唔放假「工接工」。
劉展灝話工總曾想挽留Linda，但工總出唔起港鐵開嘅幾百萬年薪，無奈要放佢走。
未來會否再招聘前高官做總裁？佢話當然咁想，但前高官渴市又搶手，好易被人撬走。
