政壇：彭志銘解畫 「收皮」非粗口
尋日都講過，喺前日嘅香港電台直播節目《城市論壇》上，工聯會嘅立法會議員「阿王」王國興同學民思潮發言人黎汶洛舌戰，阿王仲兩度叫黎汶洛「收皮啦你！」事後阿王被網民聲討，但佢辯稱「收皮」只係俚語，點都唔肯道歉或收回言論，仲拉埋社民連嘅「長毛」梁國雄落水，指長毛都試過叫官員「收皮」喎。
彭志銘指王國興講嘅「收皮」非粗口，但係下三流者先講。（資料圖片）
王國興
不過，專門研究中文俗語嘅次文化堂社長彭志銘解釋，「收皮」係上一代賭坊嘅術語，雖然唔涉及性、唔算粗口，但係下三流嘅人先會講，質疑阿王叫人「收皮」叫得咁流利，可能係好下三流嘅人喎！彭志銘仲話，阿王咁講不但有失身份，更加教壞細路，建議可以用「收聲」或「收嗲」代替，因為「收皮」仲有「叫人去死」嘅意味。唔知阿王會唔會聽專家講，就咁收聲呢？
