政壇：白鴿搶食 辣慶隔籬
喺五年前政改方案臨尾轉軚一役，導致白鴿黨內部分裂，少壯派出走成立新民主同盟（新同盟），兩黨由成立至今一直唔咬弦。新同盟尋日又出招，指控白鴿黨喺新同盟原本獲泛民協調嘅選區做嘢，擺明違反機制。白鴿黨即刻重炮還擊，話佢哋只係喺隔籬選區工作，新同盟係捕風捉影。睇嚟呢對冤家牙齒印真係好深。
（設計圖片及對白）
涉事選區係將軍澳軍寶選區，新同盟話呢個係新區，白鴿黨同新同盟早前都表明想派人出選，雙方爭持不下。舊年九月，負責協調泛民嘅民主動力時任召集人鄭宇碩決定抽籤解決問題，結果由新同盟抽中，佢哋就派出成員黎銘澤開始落區做嘢。
不過，佢哋發現白鴿黨成員陳展浚同樣喺軍寶選區出沒，於是向民主動力投訴。其後新同盟又見到白鴿黨前成員李家輝落區派單張，仲印製拍住白鴿黨主席「卿姐」劉慧卿嘅橫額懸掛喺澳唐選區。新同盟立法會議員范國威被激到生蝦咁跳，譴責白鴿黨違反協調機制，仲要用「鵲巢鳩佔、玉石俱焚」方法，搵人挑戰澳唐選區現任議員，意圖脅迫黎銘澤走，係以大欺小，「實在忍夠」喎！
辯稱喺隔籬區做嘢
但負責協調區選嘅白鴿黨副主席尹兆堅就講咗另一版本。佢話該黨完全尊重並切實執行協調機制，以前、依家同將來都冇透過任何社區主任出選軍寶選區。陳展浚只係喺隔籬富君選區做嘢，佢喺附近宣傳有乜嘢唔啱？
尹兆堅又話，卿姐係立法會議員，唔通因為區議會選舉嘅選區劃歸新同盟，卿姐就唔可以為街坊提供服務？尹兆堅奉勸范國威唔好道聽途說、過分演繹，又叫佢唔使咁認真。我哋再問范國威有乜回應？佢就話白鴿黨係狡辯，因為佢哋觀察咗半年，見到陳展浚的而且確喺軍寶做地區工作，又向選區內兩個屋苑郵寄通函，佢聲稱會密切留意白鴿黨行動喎。
