地震天災誠可怕 內耗人禍更可恨
地牛翻身，威力非同凡響！尼泊爾前日發生超強大地震，死傷枕藉，受地震威力波及，珠穆朗瑪峰大雪崩，西藏等地區亦有人傷亡。有專家話，隨着全球進入強震活躍期，中國東南沿海嘅海南及福建等地，可能發生七級以上地震，問你怕未！
最得人驚嘅係，喺今時今日地球村年代，各地人員來往頻繁，出起事上嚟，分分鐘都走唔甩。好似今次尼泊爾地震咁，港府收到二十宗港人求助個案，至少仲有五人仍然失聯，惟有希望佢哋吉人天相，大步檻過啦。
話時話，家陣世界不太平，周圍立立亂，又點止天災咁簡單吖。空難、恐怖襲擊、疫症等災難，三日一小鑊，五日一大鑊，真係死得人多。
講到呢度，太一叮不期然有少少唏噓。本來呢，相對其他地方沙塵滾滾，兵凶戰危，香港既無天災，亦無戰火，都算係一塊福地嘅。可惜吖，有啲人身在福中不知福，有錢唔去搵，專門搞搞震，好似唔整死香港唔安樂咁款。淨係講政改爭議，唔單止激發佔領之亂，幾乎將香港推向萬劫不復之地，仲將港人最引以為傲嘅法治精神一鋪打殘。唔使講咁遠，就講前日官員落區宣傳政改，結果沿途受到示威者狙擊，有人衝出馬路，有人同警察爆發肢體衝突，要幾亂有幾亂，要幾激有幾激。其實係人都知，五百萬市民一人一票選特首，總好過依家一千二百人小圈子選舉，主流民意亦支持「袋住先」，政客為反對而反對，簡直不可理喻。
法治精神崩壞，和平理性同樣冇晒。睇吓嗰班煽動中港矛盾、鼓吹仇恨思想嘅激進分子，喺反水客示威裏面殺到眼紅，不分青紅皂白，老弱婦孺一律唔放過，最慘係畀佢哋咁樣搞一搞，一簽多行改為一周一行，好客之都招牌打爛事小，自由市場基石毀於一旦先至大鑊呀。
所以話啫，香港由以往嘅經濟城市淪為政治城市，由動感之都淪為動亂之都，又點會有運行，市民又點會開心吖。睇吓早幾日聯合國公布全球快樂指數報告，香港排名跌跌不休，遠遠落後於台灣同新加坡，就知乜事啦。
始終都係嗰句︰禍福無門，唯人自招，地震天災就話躲無可躲啫，內耗人禍明明可以避免，偏偏仲要踩落個氹度，自我沉淪，福地都變成災區，仲有冇再老襯啲呀，叮！
