城中鏡：見識廚界奧運 楊崢乘機偷師
向來熱愛飲食嘅名模Vanessa楊崢，早前往歐洲為米芝蓮飲食新書做資料搜集時，參與咗歷史悠久、兩年一度兼有廚師界奧運會之稱嘅國際名廚大賽「Bocuse d'or」，仲要係喺法國里昂舉辦嘅總決賽。
楊崢（左二）與賽事金牌得主挪威隊合照。
Vanessa喜遇名廚Thomas Keller。
Vanessa此行眼界大開，體驗到大規模國際比賽嘅熾熱氣氛。近距離見識廚師選手同導師們嘅精湛廚藝時，仲乘機偷師添！喺密麻麻嘅日程中，重遇咗唔少曾合作過嘅國際名廚如巴黎嘅Eric Briffard、荷蘭嘅Jonnie Boer，Jonnie仲同Vanessa笑言評判唔易做，要一連兩日，由朝食到晚。
咁有乜難忘事？Vanessa話諗唔到平日不拘言笑嘅美國名廚Thomas Keller，當知道自己嘅高足攞到銀牌時，感動到流下男兒淚，場面溫馨。雖然見識唔少，但此行就波折重重。既被迫滯留喺西班牙機場六小時，入住嘅酒店又「燒fuse」短路，驚險萬分。可能因為呢啲遭遇，仍然單身嘅Vanessa希望真命天子快啲出現，下次可以一起同行，起碼「驚都兩份」喎。
