城中鏡：傳遷冊浪子回頭 滙豐躉盼見家鄉
據指英國對銀行業監管尺度愈來愈緊，有傳滙豐控股（滙豐）重啟遷冊檢討，集團總部選址可能重返香港，唔少政商界中人得知呢個消息都齊聲叫好，其中曾任滙豐銀行總經理、創興銀行副主席兼董事總經理Margaret梁高美懿話對此不便評論，但形容呢個係一個重大決定，有好多因素影響，而手持唔少滙豐股票嘅Margaret話以小股東角度而言絕對係好事，交少啲英國銀行稅梗係好。
梁高美懿唔評論滙豐係咪將總部搬回香港嘅消息，但以小股東角度出發絕對係好事。
王國強手持唔少滙豐股票。
林建康指滙豐總部回港係好事。
王賢訊認為有好多內地概念股值得留意。
王賢訊留意內地概念股
沙田馬場尋日舉行名錶盃賽，吸引一批名人入場湊熱鬧，見到廣東社團總會永遠榮譽會長王國強同愛沙尼亞駐港名譽領事林建康，講開滙豐傳遷冊回港，佢哋同聲表示香港一定係有好嘅地方，先吸引到滙豐考慮遷冊回港，加上兩人都係由滙豐四十幾元到百幾元價位時都有入貨，供股又有，不過都係長擺收息。
當問及當年滙豐遷冊英國嘅做法係咪做錯，林建康就笑笑口話，好多人都係咁諗，梗係返家鄉好，浪子回頭喎。
同場嘅仁濟醫院副主席王賢訊話，大牛市下各種消息同猜測都可能會有，但佢認為如滙豐真係將總部撤離英國係好事，而喺整個大環境同北水帶動下，佢相信好多內地概念股值得留意，畀佢揀就未必只係留意呢一間公司喇。
