政壇：搞搞政：阿王重炮選戰殺血路

話說當時眾嘉賓激辯提名委員會制度時，黎汶洛突然出招批評身為工人領袖嘅阿王出賣工人權益，因現有選舉委員會勞工界別嘅選民基礎只係得九千幾人，而工聯會會員就有三十六萬人，質疑阿王點解唔為工人發聲。阿王立即反駁，指學民同學聯都冇代表性，仲大叫「你雙重標準，收皮啦！」黎汶洛亦不甘示弱，即時反問阿王：「你講乜呀你？道歉呀！」殊不知，阿王再度挑機直言，「你雙重標準，收皮啦！」此時節目主持謝志峰出面調停，指阿王用詞不當，阿王立即澄清「收皮」係「俚語」。

展示《泛民收錢實錄》

除咗學生團體，阿王又炮轟泛民議員，多次展示《泛民收錢實錄》書籍，痛斥白鴿黨、公文袋同工黨等都有議員收取黑金，直斥「收錢做嘢點撬票？」所以通過政改好困難。佢又提及話好在有提委會存在，先可以質問有機會出選嘅「民主阿婆」前政務司司長陳方安生有冇收黑金，同埋公文袋余若薇同壹傳媒集團前主席黎智英嘅關係。

其實阿王咁落力炮轟泛民，加上過去多年反拉布形象深入民心，有分析指可能係為咗未來嘅選舉鋪路，事關有傳阿王所屬嘅港島區，一六年立法會選舉會由原本七席，減一席至只有六席，喺一二年選舉末席入局嘅阿王自然受影響，加上另有傳聞佢要轉戰超級區議會議席，更加要有出位言論增加知名度，為日後殺出一條血路打底。但話說回頭，「收皮」一詞始終較為粗鄙，阿王喺直播節目中先後兩次講到，如果有人投訴港台未有做好把關工作，即冇對粗口或粗俗字眼「嘟」嘅話，到時分分鐘要負責嘅係港台，而非阿王本人。