政壇：財爺話政改鬥大聲冇用
政府高官日前總動員到港九新界落區宣傳政改方案，但面對示威者狙擊全程快閃兼「離地」，當日都有落區嘅財爺「鬍鬚曾」曾俊華喺最新網誌話，呢幾日支持同反對具體方案嘅市民，都希望喺聲勢上壓倒對方，又指市民好似分成兩隊，爭奪喺政改上代表香港嘅資格，但鬍鬚曾認為政改係所有香港人須共同作出重要抉擇、共同承擔，所以大家應該係隊友非對手，唔能夠只係一味「鬥大聲」、「鬥人多」、「鬥大力」，必須作出最多人接受、最少人受損嘅抉擇。
鬍鬚曾（右）以毅行者故事談到政改嘅成人之美。旁為樂施會前總幹事莊陳有。（互聯網）
其後鬍鬚曾又提到一個毅行者故事，指呢類賽事通常四個人一組，唔係四人一同完成全程就唔係「真完成」，但有隊友走咗三十公里時力不從心，另外三人唔忍心為咗完成自己目標畀隊友捱下去，決定放棄四人一同完成嘅執着畀隊友退出。
鬍鬚曾由此提到，傾向否決方案嘅市民，因為唔能夠喺一七年達到佢哋心中嘅「真普選」，寧願先否決方案再繼續爭取，反問點解唔能夠成人之美，先畀其他市民落實佢哋嘅渴望，反而忍心為爭取自己目標而令其他市民目標落空呢？
