咁啱前晚喺一個慈善晚宴見到「九巴後人」William雷禮權，原來佢最近喺英國做咗新進嘅矯視手術，而香港暫時仲未有呢種先進嘅技術，所以佢特意飛往當地近六個星期，佢話：「個手術好勁，醫好咗我嘅老花，仲有近視同遠視都冇埋，主要都係飛機師同醫生做多，因為佢哋工作要望遠啲。」

雷禮權最近喺英國做咗新進嘅矯視手術。

咁同普通嘅矯視手術有乜分別？William話：「做完好完美，好後悔之前做普通矯視手術，都做咗有十五年，唔做仲好，因為到五十幾歲就冇用。其實乜嘢手術都有風險，最緊要搵到好醫生，手術費近二十萬元，如果唔計食宿等等，但我英國有屋企，而且香港都冇呢個手術，我戴咗保護眼鏡都有成六個星期。」

追問有冇介紹畀身邊朋友去做呢種手術，佢就話今次佢最早做，班朋友之前個個都唔敢，但依家個個都飛去做。雙眼特別精靈？佢話：「因為貪靚戴咗大眼仔啫。」佢又話太太利蘊珍好幸運，因視力一直都非常正常。

另外，貪靚嘅William仲透露即將到德國進行牙齒矯正手術，佢話：「之前箍牙將四隻虎牙同大牙磨平咗，會影響口腔郁動，口腔唔健康會影響有心臟病。今次都要去幾個月o架，但要檢查咗先知點整，本身話將成排牙整晒金色，但我要唱歌所以唔想咁核突。」

第一手消息請下載on.cc東網iPhone/iPad/Android/Windows Phone Apps