警隊一哥曾偉雄出任警務處處長多年，外界幫佢起咗個花名「禿鷹」，有說由來係因為佢一向處事作風強硬，被視為「鷹派」人物，而有警隊同袍為解開「禿鷹」說法之謎，早前趁曾偉雄出席一活動時，當面問及對於「禿鷹」呢個花名有乜回應，曾偉雄當時妙答對方識嘢，話禿鷹專食蛇同鼠喎。

有傳曾偉雄臨別警隊前夕妙答「禿鷹」花名。（資料圖片）

曾偉雄臨別警隊前夕，據警隊中人內部流傳嘅WhatsApp訊息，曾偉雄早前喺毒品調查科成立六十周年晚宴時，有同袍當面問佢，「有啲人直稱你做『禿鷹』，你有乜回應？」據引述，曾偉雄當時回應話，「如果你叫我做『禿鷹』，咁你就識嘢喇」，因為「禿鷹」除咗食腐爛嘅嘢，「仲專食蛇同鼠！即係蛇鼠一窩之類。」

有轉述有關訊息嘅人士話，自己有份參加當日晚宴，對於曾偉雄嘅說法感到佩服，而當時全場仲靜晒聽住曾偉雄嘅妙語連珠。究竟呢個流傳說法孰真孰假？就只有曾偉雄同當日嘅與會者至知嘞！

第一手消息請下載on.cc東網iPhone/iPad/Android/Windows Phone Apps