政壇：體院高層反擊審計

不過，唐家成同大輝都唔係好接受審計報告呢個批評，連日嚟多次反擊話佢哋冇利益衝突，其中大輝仲話佢哋三個人都有教育同體育經驗，可以幫手畀內行意見，完全避席係「本末倒置」。

被審計報告點名批評嘅多名事件主角逐一現身反駁質疑。唐家成尋日強調自己喺會議上已經做咗利益申報，討論議題時亦都冇投票，認為會議過程好公開，冇乜唔妥。佢又話自己只係以義工身份推動有利香港精英運動員嘅工作，當中唔涉及個人利益。

至於「伙伴學校計劃」中標嘅學校都同體院董事局成員有關，唐家成話唔係特別安排，又話香港精英運動員數量唔多，而今次涉及事件嘅三個人都有參與精英運動員學校嘅工作。

內行避席「本末倒置」

大輝接受查詢時話自己做咗教育工作十幾年，林大輝中學都係用佢個名開辦，每次佢參與體院嘅會議時都會申報利益，絕無隱瞞，亦都難以隱瞞，「就好似汪明荃喺演藝界一樣」。佢又強調如獲委任做體院董事，喺會議期間避席唔發言係「本末倒置」。

對於林大輝中學中標成功申請體院資助，大輝坦言該校過去成功培育多個運動員，喺體育界有經驗、有熱誠，唔應該因佢嘅董事身份就唔申請資助，「咁做即係扼殺學生機會」。