節約用水得把口 水務官僚最敗家
政府宣傳廣告成日叫人「咪做大嘥鬼」，其實最大嘥嘅唔係市民，係港產官僚。嗱，審計報告又踢爆港府多個部門浪費成性，包括講一套做一套嘅水務署，把口講節約用水，實際上浪費食水，唔止係大嘥鬼，簡直係敗家仔。
水務署到底有幾敗家？審計報告係咁講嘅，水務署○九年斥資逾億元，為四百二十一幢政府建築物及學校加裝節水裝置，結果令人難以置信，接近三成建築物嘅用水量竟然不減反增，增幅最驚人嘅係青衣北抽水站，用水量足足係之前嘅四十倍，簡直匪夷所思。
咁仲唔止，水務署為薄扶林區樓宇接駁海水供應作沖廁用途嘅工程，話就話於一三年大致完成，但審計報告揭發，時至今日區內仍有多達六成六樓宇用緊淡水沖廁，你話水務署嘅工程到底做乜吖？海水接駁咗去邊呢？唔怪得審計署忍無可忍，炮轟水務署浪費食水，要求該署解釋。
審計報告就講得啱嘞，水務署身為管理水資源嘅政府部門，居然帶頭做浪費大戶，安裝節水裝置後，用水量居然仲多過以前，你話係咪混帳吖？講番淡水沖廁嗰筆，問題已存在多年，點知水務署搞極都唔掂，除咗薄扶林，南區、屯門、元朗、西貢同離島等地，仍然有逾百萬人每日用緊食水沖廁，每年浪費嘅食水超過八千二百萬立方米，原因就係當局唔肯接駁鹹水喉，呢啲咪叫做敗家囉。
其實，水務署敗家醜聞又點止咁少吖。審計署近年多次批評水務署浪費食水，例如水管老化，搞到日爆夜爆、日漏夜漏，每年白白浪費二億元食水；仲有呀，水務署多年來未有正視商戶偷水，以及水錶唔準確嘅問題，令庫房一年損失近一億六千萬元。你話嘞，水務官僚敷衍塞責，得過且過，香港耗水量點會唔冠絕全亞洲吖？最離譜嘅係，你有你批評，水務署關人個關，完全唔知醜字點寫。
無錯，香港係一塊福地，內地源源不絕供應東江水，唔使再擔心制水歷史重演，但咁樣唔代表水務署可以隨便浪費食水。係人都知，食水資源珍貴，全球好多地方長期飽受缺水之苦，中國亦係人均水資源最貧乏嘅國家之一，連國家水利部都話要推行「節水優先」。反而香港身在福中不知福，水務官僚帶頭浪費食水，唔止對唔住祖國，直情對唔住全世界吖，叮！
