城中鏡：少爺占買豪宅欲給愛妻驚喜
依家樓價高企不下，年輕人上車仲難。咁啱尋日喺一個活動上見到DJ少爺占，問到有指佢以二千六百多萬豪買樂融軒單位，佢大方承認：「我個仔四月十九號一歲生日，本來諗住畀個驚喜我太太，唔知點解會寫咗出嚟？都算係做愛妻號，事關太太咁辛苦，至於投資定係自住就仲諗緊，因為依家嗰度都住得幾舒服。」
少爺占近日斥資二千六百多萬元買樓送畀太太，同時慶祝仔仔滿一歲。
外界話估唔到佢咁有錢？佢就話：「我做咗好多年嘢o架嘞，我都唔係第一次置業，因為我哋家族有個基金用嚟投資，所以唔係寫我個名o架，但都畀人知道，咁我又冇乜嗜好，又唔鍾意車，又唔鍾意音響，咪買磚頭囉，依家通貨膨脹，要諗辦法對抗個社會，其實我持有好少物業啫。」被追問會唔會生多個小朋友時，佢話：「依家太辛苦嘞，湊大呢件先啦！」
