名媛寇鴻萍女兒Lydia唐貝詩喺上周日正式受浸,成為基督徒。當日除咗佢爸媽同妹妹到場見證外,仲有女神Vivian周慧敏、Sherman鍾舒漫同張名雅等到場。剛簽經理人公司嘅Lydia將投入娛樂圈工作,做全職藝人,要以最佳狀態示人。

女神周慧敏(左)到場見證唐貝詩(右)受浸。

唐貝詩爸爸(右一)、媽媽及妹妹(左一及二)亦捧場。

唐貝詩受浸一刻。

問到受浸嘅心情係咪好感動?Lydia話:「有啲。感覺自己成長咗,其實最感動係媽咪,佢一直都話我係小魔女,以前細個自己係有啲反叛,媽咪見到(受浸)嗰一刻都有啲激動,近幾年覺得自己成長咗,依家真係好想專心工作。其實全家人都係基督徒,佢哋全部都受浸,只剩我一個仲未,依家終於都受浸嘞,當日好開心見到Vivian同Sherman,咁啱我哋返同一個教會,特別係Sherman,佢畀咗好多鼓勵我。」

Lydia為做藝人而積極裝備自己,除咗學習瑜伽外,仲去學演戲,佢話:「簽咗新公司,如果公司開戲有合適我嘅角色,咁就能夠學以致用。可能人長大咗,依家諗嘢嘅價值觀同以前好唔同,現在想好踏實啲工作同做事,畀觀眾睇到我嘅努力同了解更多。加上知道娛樂圈會有唔少誘惑,所以喺做藝人之前,要調整好自己嘅思維。加上媽咪從小都教我同妹妹做人要謙虛及愛人如己,我會牢牢記住。」

第一手消息請下載on.cc東網iPhone/iPad/Android/Windows Phone Apps