城中鏡：高官議員 「瞓身」聽政改
尋日政務司司長林鄭月娥喺立法會公布特首普選方案及諮詢報告，三司十二局首長當然要撐場坐定定聽書，部分冇份陪坐大廳嘅副局長同政治助理亦都聽話，走上二樓旁聽席見證重要時刻。不過，官員以至席上唔少議員收到「周公」急CALL，去晒「釣魚」瞌眼瞓，而泛民主派議員離席後，留低嘅建制派議員亦各有節目打發時間。莫非大家睇完東方報業集團日前有關政改嘅權威消息報道後，覺得唔使再聽？
邱誠武（右）強調合埋眼只係為咗「視覺上更加focus（專注）」。
張宇人（舉頭者）難敵睡魔，瞓到頭岳岳。
「釣魚」常客黃定光喺政改關鍵時刻繼續「垂釣」。
今次旁聽席唔多覺有行政會議成員蹤影，副局長同政助就好齊心報到，但記者發現運輸及房屋局副局長「邱副」邱誠武幾乎由頭瞓到尾，個頭仲不自覺咁無定向周圍擰，似乎真係冇乜精神，莫非佢又係瞓身支持政改方案？至於佢嘅其他官員同事唔係呆坐就係睇手機，唔通聽林鄭宣讀聲明仲催眠過返工？
邱副：合眼更專注
事後問番邱副，佢斬釘截鐵否認瞌眼瞓，強調「聽晒全程」，合埋眼只係為咗「視覺上更加focus（專注）」喎。未見瞌眼瞓嘅勞工及福利局副局長蕭偉強就幫口話，係人都知有記者影住，係都唔會上去瞓啦，大家戴住耳筒聽報告，可能要合埋眼先夠聚精會神喎。如果係咁，特首同三司以後唔使去立法會，整個紙板人喺度，播聲帶得啦！
狙擊長毛 阿王捉蟲
至於留低嘅建制派議員亦難敵睡魔，除飲食界張宇人、進出口界黃定光係「釣魚」常客外，葉劉淑儀就睇新聞剪報打發時間。而精神旺盛嘅王國興就時刻把握機會狙擊「長毛」梁國雄，趁長毛發言時，向主席曾鈺成投訴長毛只係發表意見，並非提問，但反被曾鈺成訓斥：「好高興你睇到個問題，但你正話開咗個好壞嘅先例」，不滿王國興發言時同樣用成三分幾鐘發表意見，認真捉蟲。
