政壇：兩大醫學院長出拳宣傳防癌
港大同中大醫學院嘅院長平時官仔骨骨，因乜事拳王上身咁嘅款，唔通為咗爭學生而動粗？原來佢哋係幫衞生署做防癌宣傳，粉墨登場拍電視廣告。中大醫學院院長陳家亮仲自嘲NG咗好多次，錄幾句嘢錄咗半晝。講番條宣傳片，一共有兩輯，尋晚開始喺電視、電台、社交網站同專題網頁有得睇。
梁卓偉（右）同陳家亮拳王上身，一齊宣傳防癌訊息。
港大醫學院院長梁卓偉話佢哋都係用放假時間去拍片，地點係舊邵氏片場，署方製作好認真，各自用咗半晝拍攝，係咁重覆講幾句台詞，講到識背。衞生署尋日舉行記者會，首播呢兩輯廣告，有份拉攏兩大院長拍廣告嘅衞生防護中心監測及流行病學處主任程卓端話，雖然兩個院長拍得辛苦，但都要淪為大配角，因為主角竟然係衞生署創作嘅卡通「防癌隊長」，認真搞笑。
