政壇：搞搞政：溫和泛民暗撐預算案剪布
立法會尋日繼續審議財政預算案撥款，拉布三子繼續拉布，但最奇怪嘅係其他泛民聲都唔聲吓。過去立法會主席曾鈺成「剪布」嘅時候，泛民議員既會譴責，甚至有議員提出司法覆核，點解今次「剪布」成班泛民都無聲無氣呢？其實，白鴿黨嘅議員單仲偕早前已表明該黨唔會參與拉布，但就反對預算案。換言之即係做花生友喇！
（設計圖片及對白）
恐輸區選 扭軚拒參與
據了解，泛民尋日開緊急飯盒會都有討論主席「剪布」一事，而佢哋嘅回應竟然係：「知悉主席安排，不評論。」等於變相默許主席「剪布」。其實早在周一，我哋已經發現身為飯盒會主席嘅梁家傑，喺曾鈺成宣布要「剪布」嘅時候古古怪怪，問佢泛民有乜嘢行動又話「要傾吓先」。
其實「拉布」玩足幾年，已經浪費唔少公帑同議會時間，令市民大感不滿，正如財爺鬍鬚曾批評「拉布已成票房毒藥」。泛民今次不單止唔再參與兼縱容「拉布」，仲同建制派協議輪更，以免因有人「拉布」同法定人數不足而流會，莫非泛民終於覺悟？據知係因為區議會選舉將喺年底舉行，泛民唔少議員都怕繼續「拉布」會乞人憎，要喺選舉付上代價，所以紛紛同「拉布」劃清界線，對主席「剪布」更加隻眼開隻眼閉。
雖然「拉布」無咗溫和泛民支持，但幾位「拉布」議員依然拉得不亦樂乎，佢哋尋日就十二次要求點算開會法定人數，一朝早就已經浪費咗兩個幾鐘開會時間，納稅人嘅血汗錢就咁倒落鹹水海。依家連溫和泛民都覺悟，唔敢再支持「拉布」，唔知激進泛民議員幾時先肯收手呢？
