港交所行政總裁李小加尋日喺台北出席經濟論壇，講題係「從滬港通、深港通看兩岸及香港資本市場合作」。複雜嘅兩岸三地市場合作關係，喺小加總裁口中，就變成咗好簡單嘅鹹水魚、淡水魚生態。果然巧妙。

小加總裁話A股市場嘅股民係淡水魚，如果游去國際市場個大海，可能會浸死；相反，國際投資者係鹹水魚，游入內地呢個淡水區亦會死。不過，啱啱好香港係鹹淡水交界，聯繫內地接通國際，佢又認為兩地合作嘅範圍只會愈來愈廣。

近期《大時代》重播，小加總裁有冇坐定定睇？佢話以前睇過喇，不過唔明點解係要話丁蟹一出就必然跌市！佢話，只不過係次次都揀牛市時重播，股市去到高位，播完之後跌好自然。咁佢點睇丁蟹？小加話「非常Entertaining」。

第一手消息請下載on.cc東網iPhone/iPad/Android/Windows Phone Apps