政壇：陳耀星自爆未住過荃灣

講到年底區議會選舉後會取消委任制，本來屬委任區議員嘅陳耀星就話唔會轉戰直選，皆因佢年紀都有番咁上下，係時候退落嚟畀多啲機會其他年輕人，仲講笑話年紀大冇咁好體力四圍拉票，所以疊埋心水退休歎世界。佢透露，年底退休後會先同家人去旅行，地點到時玩即興，又笑笑口話終於可以擺番多啲時間喺佢嘅跑馬興趣之上嘞。

但佢話喺荃灣咁多年，日日同區內街坊撞口撞面已經變到非常熟落，始終好有親切感，所以退休後可能會間中返去行吓。問佢會唔會想兒子陳湛全嘗試從政，佢就坦言冇諗過喇，既然阿仔冇興趣就唔會強迫佢哋，等佢哋做番自己鍾意嘅嘢咁樣仲好。