政壇：車公靈籤應驗沙田燈熄
每逢大時大節，十八區區議會都會喺區內懸掛燈飾增添氣氛，沙田節日燈飾統籌委員會舊年就申請咗二百萬元公帑，喺城門河兩岸懸掛燈飾，點知今年二月十八至十九日，即農曆年三十晚同年初一就冇着燈，搞到烏燈黑火。有沙田街坊就話，今年沙田鄉紳喺年初二為沙田運程求得嘅車公靈籤，籤文就有句「萬家燈熄斷管弦」，估唔到車公真係咁靈喎。
（設計圖片）
今年農曆年初二，沙田鄉事委員會副主席李志麒為沙田求得第三十二號下籤，籤文為「聞道今宵是上元，銀燈火樹耀長天；無端一陣狂風雨，萬家燈熄斷管弦。」解曰：「凡事不宜」。估唔到原來籤文嘅預示早兩日已經出現。
沙田區議員丘文俊早前就收到沙田街坊投訴，話瀝源橋兩岸燈飾喺年三十晚同大年初一都冇開到，加埋正正中咗籤文預示，覺得極唔吉利、有不祥之感。丘文俊於是就燈飾變「燈熄」一事向政府查詢，問當局點樣紓緩居民嘅不安情緒。
區議員批嘥公帑
沙田民政事務處日前就回覆話，燈飾承辦商喺燈飾懸掛期間每日都派員巡視燈飾懸掛地點，而二月十八日晚（年三十晚）承辦商職員已經發現部分地點嘅電掣發生故障，令燈飾開唔到，雖然翌日（大年初一）已派人維修，點知因天雨關係再度故障，承辦商擔心職員安全，所以到二月二十日（年初二）先再維修，即晚燈飾已經着番晒，而籌委會亦已要求承辦商使用質素好啲嘅燈飾材料。
不過，丘文俊就唔係好滿意政府嘅答覆，質疑如果唔係街坊投訴，籌委會都唔會知燈飾故障一事，又話「錢就外判商賺，但燈就開唔到，政府仲要唔知！」批評籌委會係失職兼係浪費公帑。
