發展大嶼水療村 最怕又煲無米粥
橋唔怕舊，最緊要受，喺港產官僚力谷之下，發展大嶼山再次成為熱門話題。當局嘅最新搞作係，計劃喺大嶼山長沙及大鴉洲興建水療度假村，仲話要擴大貝澳營地，打造成首屈一指嘅旅遊新景點喎。講就好聽嘞，但究竟做唔做得到，仲要睇過至知。
係咁嘅，發展局高官自爆，當局正研究喺大嶼山興建水療度假村，仲話會引入有本土特色嘅市集添。另外，當局仲計劃擴大貝澳營地嘅規模，以故事或宗教形式，串連貝澳至觀星熱點狗嶺涌等旅遊點，目標係將大嶼山打造成香港旅遊首選地。有人仲提議喺貝澳引入露營車，到時旅客可以喺車上吹吹風、談談情、睇睇星，諗起都幾浪漫。
學古人話齋，先生之志大矣，先生能力不足。計劃的確幾吸引，弊在港產官僚志大才疏，講到天花龍鳳又點吖，冇實際行動盞嘥氣嘅咋。到底幾時落實計劃呢？發展局官僚係咁講嘅，由於涉及唔少城市規劃及法律程序，交通配套亦唔可能一蹴而就，估計至少五至十年先睇到成果。
即係咁，如果五至十年真係可以睇到成果，咁又唔怕等呀，最怕港產官僚高估自己能力，低估施政阻力咋。大家有眼見，家陣社會泛政治化，政客為反對而反對，加上環保及社區阻力重重，當局嘅如意算盤想打得響都幾難。呢，保育團體批評有關計劃會引發大嶼山生態災難，表明會反對，當局聽到未吖？
話時話，發展大嶼山水療度假村早就唔係新聞，董建華年代已經提出，眨吓眼十幾年過去，依然得個吉，問你服未。現屆政府重彈舊調，早前仲煞有介事成立大嶼山發展諮詢委員會，一時話要發展經濟橋頭，一時話要興建衞星商務城市，諗頭多多，但睇怕又係煲無米粥。試諗吓，反對派拉布不止，連財政預算案都被拖延，就算當局有心搞水療度假村，都無能為力喇。
本來呢，隨着港珠澳大橋即將落成，機場第三條跑道亦計劃興建，發展大嶼山真係有得諗。可惜，港府議而不決嘅施政陋習十幾年如一日，淨係識得紙上談兵，加上無良政客唯恐天下不亂，一味沉迷政治鬥爭，正經事無人關心，講乜都冇用喇。計太一叮話齋，香港深陷政治泥沼，成日內鬥內耗，搞到競爭力每況愈下，怕且唔使幾耐，打回原形變番小漁村都似，叮！
