城中鏡：仇氏姊弟合璧 新菜衝上雲霄
老實講，飲食業除咗長期難請人之外，仲要留住食客，少啲新意都唔得。面對租金高企，想突圍而出，一定要搞搞新意思，米芝蓮食府新斗記品牌總監Karen仇曼瑩同細佬兼公司董事Jonathan仇祖薰現時就雙劍合璧拍住上，家姐負責煮，細佬就試食，把握每一個機會鑽研同發掘新菜式，本月起，佢哋仲會同港龍航空合作推飛機餐，將中式美食帶上三萬尺高空。
仇曼瑩（左）同細佬仇祖薰（右）拍住上與航空公司合作推飛機餐。
Karen對烹飪好有興趣，縱然平日工作繁忙，在家時間唔多，但每逢周末，佢都會親自下廚煮意大利菜，媽媽就熱愛煮上海菜，互相交流，細佬同爸爸就負責食，相當有口福。
佢哋一家仲不時去旅行搵靈感，每去到一個地方，都會對當地食物特別留意，好似對上一次去泰國，佢哋就特地向當地嘅廚師去偷師，請教烹調地道菜式嘅秘訣。
