城中鏡：王敏德伉儷做「玉石潮人」
城中名人同模特兒早前獲邀到澳門為某品牌拍攝廣告造型，而馬詩慧就以潮人本色演繹出翡翠時尚嘅一面，而佢老公Michael王敏德，就係佩戴翡翠嘅型男。
王敏德（中）同老婆馬詩慧早前獲邀到澳門為某品牌拍攝關於翡翠飾物的廣告造型。
馬詩慧指玉石設計已很時尚，只要喺配襯上花心思，可以好有型。
為咗以最Fit狀態示人，馬詩慧事前一、兩日減少食澱粉質，亦會早啲瞓。就係咁簡單？佢笑言：「敷Mask同做運動，有冇工作都要做，有嘢先做係咪遲咗少少，仙丹咩？」拍完呢輯相之後，佢發覺今時今日嘅玉石設計已非常時尚，唔似以往嘅土氣，只要喺配襯上花點心思，可以好Young、好有型，要做「玉石潮人」冇難度。佢又話：「戴翡翠唔一定要束髮着長衫，着恤衫、牛仔褲，甚至波鞋都得，視乎個Design同自己點去演繹。」
Michael就配襯唔同嘅翡翠吊墜頸鏈，佢話：「平時我好少戴飾物，戴翡翠都係第一次。大型翡翠擺設我見得多，咁大塊嘅翡翠吊墜，大到好似八達通咁，都係第一次見，而且晶瑩剔透，真係好靚！」Michael更畀Tips話：「除咗恤衫西褲可以襯啲細細粒嘅翡翠吊墜頸鏈外，簡單一件T恤牛仔褲，戴條大翡翠吊墜長頸鏈，都幾有型。」
