眾所周知，身兼港區全國人大代表嘅行會成員陳智思鍾意畫畫，而尋日佢出席一個藝術活動時，就即席動筆施展畫功。修讀藝術畫畢業嘅佢，喺過去二十年總共舉辦畫展三次，佢話：「咁當然唔係我個人畫展啦，同屋企人合辦嘅，因為我媽咪都係畫畫o架，我哋每個人嘅畫風風格都唔同。」

即席動筆施展畫功，對陳智思嚟講可謂冇難度。

咁有冇收藏其他藝術品呀？陳智思笑言：「連我自己嘅畫都唔夠地方放，所以都冇收藏其他嘢啦，而我仲專登開咗個office，專門擺自己啲作品。」

除咗畫畫外，佢話保存同保養畫作都好緊要，又話：「一定要搵間好嘅公司做保養，真係一分錢一分貨，因為畫作好易氧化o架！而幾錢保養一幅畫，就要睇選料嘞，平均都要三千蚊以上，仲未計個畫框喎。我最貴嗰幅畫就要一萬蚊，價錢再貴啲都有，但我就未試過啦！」

第一手消息請下載on.cc東網iPhone/iPad/Android/Windows Phone Apps