政壇：KK疑濫權亂泊車
立法會議員KK馮檢基再惹「車禍」！KK駕駛凌治車半年，於兩周內先後惹禍。繼日前有讀者報料，指佢喺立法會停車場倒車泊位時，涉嫌撞花建仔立法會議員兼行政會議成員李慧琼嘅座駕車頭「泵把」並不顧而去，但佢已否認。點知尋晚再有讀者報料指KK「又亂泊車」，圖文並茂，投訴佢濫用職權，無視邨內已有領匯停車場，擅自將座駕停泊喺何文田邨消防通道，同時批評房屋署執法不公，容許議員享有特權。
馮檢基擅自將座駕停泊喺何文田邨消防通道，被投訴享有特權。（讀者提供圖片）
馮檢基
KK認係該車車主，但佢聞言後再次呼冤，稱只係聽從停車場保安員指示喺上址泊車，過往會見市民時都會停泊上址，「已經唔係第一次」，又話其他市民都係咁泊，佢為表清白更着記者親自向停車場保安公司求證。根據報料調查車主資料，發現涉嫌違泊車輛係由佳亞顧問有限公司持有，KK正係有關公司嘅唯一董事。
